Yangiliklar

5 o‘lchovli ta’limning Qo‘qon amaliyoti

2026-yil 12-iyun kuni Qo‘qon shahrida “Besh o‘lchovli ta’lim” dasturi doirasida o‘tkazilgan loyihaning yakunlash marosimi bo‘lib o‘tdi. Unda Qori Niyoziy nomidagi Tarbiya pedagogikasi milliy instituti direktori, pedagogika fanlari doktori akademik Xolboy Ibraimov va institutning bir guruh olimlari ishtirok etdi.

2026-yil 6-apreldan 12-iyunga qadar bo‘lgan 10 haftalik (50 kunlik) davr mobaynida Qo‘qon shahri hokimining tashabbusi hamda Qori Niyoziy nomidagi Tarbiya pedagogikasi milliy institutining tashkiliy ko‘magi asosida Qo‘qon shahridagi 14-sonli umumta’lim maktabida maxsus “5D-ta’lim” pilot loyihasi amalga oshirildi. Loyihada asosiy e’tibor o‘quvchilarda axborotni izlab topish, matn mazmunini tahlil qilish va o‘qilgan materialni anglash ko‘nikmalarini shakllantirish hamda rivojlantirishga qaratildi. Baholash va refleksiya qilish ko‘nikmalari “Butunlikka” asoslangan besh o‘lchovli retseptiv ta’lim modelining muhim tarkibiy qismi hisoblangan “uch daqiqalik mulohaza” usuli orqali rivojlantirildi. Mazkur amaliyot o‘quvchilarning o‘z fikrlari, his-tuyg‘ulari va xatti-harakatlarini tahlil qilish, shuningdek, o‘quv materialini shaxsiy tajriba bilan bog‘lash qobiliyatini rivojlantirishga xizmat qildi. Shakllangan ko‘nikmalarni mustahkamlash maqsadida har to‘rt haftada intensiv ta’lim modullari tashkil etildi. Ushbu mashg‘ulotlar davomida o‘quvchilar egallangan bilim va ko‘nikmalarni chuqurlashtirish hamda amaliyotda qo‘llash imkoniyatiga ega bo‘ldilar.